店長呢｜2025.04.07

齊人開咪｜歡迎長夢書店加入！／長夢Ella的歌手身分／書店一定要搞活動？／活動冇人報名，到底做錯了甚麼？／唔捨得「覺閣」

 

【搞活動搞到灰？】

二月去完台北書展安排咗好多活動，有啲好多人，但有啲就少到得三四個，所以開始有啲lost：到底點先會多啲人？少人要唔要繼續搞？另一方面，有朋友開書店揾我哋幫手，問係咪要搞好多活動，我話你可以搞，但都唔一定會好多人⋯⋯最近多咗啲對活動嘅思考，所以就想一齊傾吓～

我哋三個店長之前都係「七份一」嘅，嗰陣已經慣咗成日搞活動，同埋好以自己興趣為先，而家都keep到呢樣嘢；不過都有被邀請或者租埸合作活動。當然都由於想多啲人嚟，所以我哋年頭話每個月要搞6個活動，做到，但效果未必每個都咁滿意，有啲人數冇預期咁多，有啲討論氣氛或者深度唔係好夠，就會覺得麻麻哋。

 

【搞活動之必要？】

有啲讀者會成日上嚟，清明連假三日嚟咗兩日，坐3個鐘（畫外音：勤力過拜山XD），都多謝佢哋成日上嚟，咁我哋keep住搞活動，例如每月會員有個地方聚吓，嗰啲多數回贈返書券其實都唔賺錢～

我嘗試從一個搞手嘅角度去諗，除咗旺丁旺財之外，其實可以sell到唔同嘅書。界限嘅選書未到好闊（大眾化），好靠人推，而我係主力負責睇書再介紹嘅，成日都覺得睇得唔夠快、唔夠闊，搞活動就可以有人幫我介紹吓XD 活動sell書補足店長未涉獵到嘅種類，可以保持活力～

 

【活動宣傳睇到厭煩？】

我諗而家搞活動門檻低咗，大家有嘢想試就會去做，可能大家會見到好多人都搞活動呀，好多嘢轟炸佢⋯⋯但我唔講你咪睇唔到囉？所以宣傳上好似去咗一個好kick嘅狀態。不過永遠都係想大家有興趣先嚟玩～我有諗過會唔會係宣傳時間太少，可能夾晒所有單位再出post已經得返十日大家睇唔切？不過有時預足兩星期都未必多好多人。

好多讀者都好錫我哋，每間書店都會留意，前排有推過「同一日好多活動嘅話可以輪住去」，唔知最後有幾多人咁做，而家好似少啲咁有energy嘅讀者可以一日去好多間書店，而佢哋好多活動都會miss咗，先令我覺得係咪應該搞少啲。

 

【跟住搞咩好？】

最近覺得自己搞嘅活動都幾好，例如華語文學書友聚一齊傾吓小說散文，未必次次好多人但都傾得開心，或者會員聚會、店長他嘅寫作坊等等。自製活動都幾幫到我哋提升信心XD

我哋三個都有討論過，界限做嘅嘢冇得點變，甚至試咗好多嘢：入中學、開tg/wts channel、出版、搞活動、租埸、開網店⋯⋯差唔多試晒，好似去到一個樽頸位唔會再多啲人嚟；但我都有諗係咪期望嘅問題呢，而家多咗人搞活動，大家會揾到好多嘢玩（甚至唔使錢），咁點解要畀錢嚟呢？

 

【唔敢冒險嘅讀者V.S.唔想放棄嘅搞手？】

可能我哋未必好專業，但都一定好用心去搞，我覺得有啲人可能冇咁大好奇心，或者唔想思考太多，或者怕中伏⋯⋯即係好似睇戲咁，如果準備睇之前見評價一半半或者好差，就未必會想入埸睇。唔知讀者考慮參加活動係咪都覺得有risk，可能付出咗嚿錢坐個幾鐘，最後未必攞到咁多嘢走；有時啲書定位太「精準」，一見到活動張圖或介紹唔啱心水就唔嚟，唔ready接觸新鮮事物。

想再提出一個思考點：大家（書店夥伴）都覺得有啲活動係正嘅，就算自己冇咩energy或者唔太擅長去做，都希望嗰件事會發生；好多正嘅嘢keep住發生緊，而我哋又想帶嚟書店，所以即使少咗人嚟都未必第一時間諗搞少啲活動。前排因為knock knock要結業，我哋幾個都覺得好可惜，因為每間書店嘅特色同店長風格都唔同，佢哋完咗我哋都唔會接到佢哋嘅讀者（畫外音：一定接唔到啦唔好搞笑）。

 

【書店需要讀者「在埸」】

我哋想喺某個時間搞某個活動，係一種緣份，同埋捉住當下社會嘅狀態，每間書店有自己想做嘅嘢，所以都唔會夾你搞咩我唔搞咩，最後成日炒晒車XD 雖然好難，但我覺得有興趣嘅活動都要盡量去聽，因為一個活動搞得開心，未必搞第二次，反應唔好就一定唔會再搞添，所以你永遠淨係會見到你有興趣嗰一次，如果唔參加就冇。就算下次請返同一個嘉賓，搞返同一個活動，參加者唔同個vibe唔同，都唔會係同一件事——「在埸」，搞活動或者書店作為一個空間嘅意義就喺呢度。